Novas
ESTÁ CENTRADA NAS RELACIÓNS DA COMUNICACIÓN COA XUVENTUDE, AS PERSOAS MAIORES E AS MINORÍAS ÉTNICAS
A revista Comunicación e Cidadanía publica o seu segundo número
[15/01/2009] O Observatorio Galego dos Medios (OM) do Colexio Profesional de Xornalistas de Galicia (CPXG) ven de sacar do prelo o segundo número da Revista Comunicación e Cidadanía. Revista Internacional de Xornalismo Social / Social Journalism International Review.
Este número, que corresponde ao ano 2008, está centrado na relación da comunicación coa xuventude, coas persoas maiores e coas minorías étnicas. Así mesmo, por primeira vez, a revista abre un apartado chamado "Varia" para artigos recibidos fóra dos temas centrais propostos.A revista, con 350 páxinas, inclúe artigos de expertos internacionais no xornalismo social, con algunhas participacións chegadas desde Estados Unidos, Portugal, Arxentina, Bélxica ou Australia. Tamén investigadores galegos e estatais colaboran nesta revista que recolle ponencias escollidas e as conclusións dos foros organizados polo OM, así como outros informes do Observatorio e artigos recibidos de temas diversos. As linguas de publicación na revista son o galego, o portugués, o castelán e o inglés.
Comunicación e Cidadanía quere participar con mirada crítica e ao tempo solidaria no debate sobre a función actual del xornalismo, nun contexto de cambios e transformacións sociais que o interpelan e ameazan. Desvelando os seus condicionamentos e as súas crises através da investigación e a confrontación de ideas entre investigadores e investigadoras académicas, profesionais e colectivos sociais é como esta nova revista vai contribuir a que o xornalismo dea unha visión máis ampla da realidade social que axude á construción dunha sociedade máis inclusiva e participativa.
A revista envíase por correo a principais persoas e institucións que traballan sobre o xornalismo social no mundo, con especial atención ao noso entorno máis cercano. As colexiadas e colexiados do CPXG poden solicitar un exemplar, e tamén poderá descargarse en breve da páxina web do Observatorio Galego dos Medios (observatoriodosmedios.org). O OM chama a investigadores e investigadoras, xornalistas e persoas interesadas no xornalismo social a colaborar enviando artigos para o vindeiro número, que se publicará ao longo deste ano.